Сте слушнале за dino porn? А за dragon erotica? Ова се само два од многуте WTF книжевни жанрови што искочија последниве години, од пуста желба и посветеност да се биде авангарден и креативен, а помогнати од опцијата за „самоиздавање“ или self-publishing, достапна како една од прекрасните работи што ги нуди интернетот. Долгометражни приказни за луѓе и цели нации со карактеристики позајмени од моќни животни како би биле посекси и поподобни за некое холивудско студио да каже „дај од тоа вукодлакот најјак“, многу брзински напишани варијанти на „50 нијанси сиво“ и многу, најмногу вампири се продаваат упорно по дигиталните книжарници. А на некој на Твитер му текнало дека тоа мора од некаде да искача, и тоа ако постојат музи за сите убавини што ги памти светот, тогаш една мора, МОРА да е одговорна и за Twilight, и за Кристијан Греј, па и за ова подоле:
The Worst Muse на Твитер е генијален акаунт што твита идеи што само вакви автори како Кристи Симс можат да ги прифатат (100% псевдоним, пошто, ај оди во супермаркет, сретни се со на татко ти колега и речи му „да бе, јас сум со надарениот птеродактил, хехе“. Дупло незгодно, ем искача дека ти истражуваш, па пишуваш за џурасик гениталии, ем, што тоа гуглал колегата на татко ти?). И таму, на пример имате совет:
It’s still not too late to add a vampire. #NaNoWriMo
— The Worst Muse (@WorstMuse) November 29, 2014
или, „Уште не ти е касно да додадеш вампир“.
Меѓу појаките идеи:
- Во право си. На светот СТВАРНО му треба уште еден роман со возрасен професор по англиски и неговата афера со млада, но сексуално созреана студентка.
- Конечно, година на избори! Време е да го почнеш тој тешкиот политички роман!
- Роковите се за идиоти. ТИ си уметник.
- Сигурен си дека се беше јасно во претходното поглавје? Може треба да смислиш дијалог каде што главниот лик ќе објасни се во детали.
- Главниот лик направи го народен човек, што значи како тебе, само со подобри шанси за романса.
- Ако ликот е од Њујорк, тогаш мора да е манекен/ка или писател/ка, нели?
- Види, ако тој отуѓениот родител не станува херој или негативец, боље убиј го уште одма.
- Мда. Тоа волците дефинитивно би се спријателиле со главниот лик. Тоа баш звучи како нешто што би го направиле волци.
- Лош близнак? Закон!
- Како мислиш уште се живи родителите на главниот лик? Све ли јас да ти кажувам?
- „Рече“ е многу досаден збор. Боље врати го „ејакулираше“.
- Да, квантна физика точно така функционира. Браво.
- Главната ти е пресовршена? Можеш да ја направиш преслатко трапава и нонстоп да треба некој да ја спасува.
- Светот нема доволно копии на Буковски.
- Никогаш не знаеш кој ќе биде последниот тренд, така што поарно стави ги сите можни натприродни суштества за кои што имаш слушнато.
Бонус: Жени и кондури, така?
Е, замислете, од сите музи што ги знаеме, оваа најлошава како најактивна да е. Описот на Твитер („Не, најозбилно, терај. Ќе биде бестселер“) се поклопува со самодовербата и ароганцијата што доаѓа во комбинација со глупоста како феномен. И додека сепак, тешко е да измислиш ново, па се ДОБРО што излегува на пазарот е труд и умешност да се работи со некоја веќе постоечка идеја, сепак, запрашајте се, дали СТВАРНО на светот му е потребен уште еден роман со вампири?
P.S. Ако баш ве занима, овде можете да видите за што се работи во Taken By The T-REX.
Skopje & Me 